Ақмолалық төтенше жағдай қызметкерлері тракторды өрттен аман сақтап қалды, – деп хабарлайды «Aqmola News» Ақмола облысының төтенше жағдайлар департаментінің баспасөз қызметіне сілтеме жасап,
Көкшетау – Атбасар күре жолының бойында МТЗ-92 маркалы трактордың тіркемесіндегі сабан тұтанып жана бастағаны туралы хабар бүгін күндізгі 11:49-да Сандықтау аудандық төтенше жағдай бөліміне түскен.
Оқиға орнына жеткен төтенше жағдай қызметкерлері трактордың тіркемесіндегі сабанның өртеніп жатқанын көріп дереу сөндіруге кірісті. Өрт сөндіруге Балкашино селосындағы өрт сөндіру бөлімінің қызметкерлері мен техникалары, «Жабай» ЖШС-нің бір бірлік техникасы мен жергілікті полиция қызметінің техникасы жұмылдырылды. Өрттің салдарынан 50 шаршы метр аумақта 6 тонна сабан жанып кетті, – деді Сандықтау ауданы төтенше жағдайлар бөлімі бастығының міндетін атқарушы Бауыржан Жолдасов.
Дегенмен өрт сөндірушілер 7 миллион теңге тұратын МТЗ тракторын өрттен аман алып қалған.
