Ақмола облысының Аршалы ауданында құрама жем зауыты іске қосылмақ. Жаңа өндіріс орны толығымен ішкі нарықты қамтамасыз етуге бағытталған – деп хабарлайды «Aqmola News».
Майра ҚУАНЫШҚЫЗЫ
Бұл туралы Ақмола облысының кәсіпкерлік және өнеркәсіп басқармасы мәлім етті.
Аршалы ауданында жүзеге асырылып жатқан құрама жем зауыты инвестициялық жобасының құрылысы аяқталуға таяу. Зауыт жылына 28 мың тоннаға дейін өнім өндірмек. 370 миллион теңгеден астам инвестиция салынған жоба бойынша 15 жаңа жұмыс орнын құру жоспарланған.
Құрама жем зауытында қолданылған заманауи технологиялар сапалы және қауіпсіз өнім алуға мүмкіндік береді. Жоба толығымен ішкі нарықты қамтамасыз етіп, импорттық өнімдерді алмастыруға бағытталған. Құрама жем өндірісінде арпа, сұлы, кебек және басқа да арнайы қоспалар пайдаланылмақ, – дейді Ақмола облысының кәсіпкерлік және өнеркәсіп басқармасының басшысы Ербол Оспанов.
Қазіргі уақытта нысан салынып, құрал-жабдықтарына монтаждау жұмыстары жүргізілген. Зауытты қазан айында іске қосу көзделіп отыр.