«Ел бірлігі» қоғамдық бірлестігі Ақмола облысы Ішкі саясат басқармасының әлеуметтік тапсырысы бойынша Қазақстан халқы тілдері күні мерекесі аясында, ұлтымыздың ұлы перзенті Абай Құнанбайұлының 175 жылдық мерейтойына орай «АБАЙДЫҢ СӨЗІ – ЖҮРЕКТІҢ ҮНІ» атты әуесқой және кәсіби жазба ақындар арасында облыстық онлайн мүшәйра жариялады, – деп хабарлайды «Aqmola News».
Майра ҚУАНЫШҚЫЗЫ
Бұл туралы қоғамдық бірлестік төрағасы Бақыт Смағұл мәлім етті.
Ақындар мүшәйрасы екі кезеңде өтпек.
Арнайы құрылған қазылар алқасының шешімімен байқауға қатысуға тілек білдірген әуесқой және кәсіби ақындар ішінен (әрқайсысынан) 6 үміткерден таңдалып, қорытынды кезеңге жолдама беріледі. Мүшәйра қатысушыларының жас ерекшелігіне шектеу қойылмайды. Онлайн мүшәйраға бұрын еш жерде жарияланбаған тақырыпқа сай өлеңдер ғана қабылданады, ұсынылған туындылардың көркемдік деңгейіне баса назар аударылады. Байқау материалдары тамыздың 15-25 аралығында қабылданбақ. Қорытынды кезеңде жеңімпаздарды анықтау 30 тамыз – 5 қыркүйек аралығында әлеуметтік желілерде дауыс беру арқылы жүзеге асырылады. Мүшәйраның І, ІІ, ІІІ орын иегерлері ең көп дауыс жинаған қатысушылардың арасынан қазылар алқасының шешімімен анықталады, – деді Бақыт Смағұл.
– Байқаудың жеңімпаздары арнайы дипломдармен және бағалы сыйлықтармен марапатталмақ. Сайыстың қорытындысы 2020 жылғы қыркүйек айының алғашқы онкүндігінде жарияланатын болады.
