Карантиндік талаптарды сақтамаған симптомсыз вирус тасымалдаушыларға айыппұл салынады. ҚР мемлекеттік бас санитарлық дәрігері Айжан Есмағамбетова симптомсыз вирус тасымалдаушылардың қалай бақыланатынын айтты, – деп хабарлайды «Aqmola News» .
Бұл туралы еліміздің бас санитар дәрігері орталық коммуникациялар қызметінде өткен брифинг барысында мәлім етті.
«Симптомсыз адамдар алдын ала анықталғаннан кейін қолхат алынады. Қолхатта карантиндік талаптарды сақтау туралы, өзін-өзі оқшаулау сияқты талаптар бар. Оны ескермеген жағдайда, әкімшілік жауапкершілікке тартылып, айыппұл салынады. Егер де симптомсыз КВИ тасымалдаушының басқа біреуге жұқтырғаны анықталса, онда қылмыстық заңнамаға сәйкес, «қасақана жұқтыру» фактісі ретінде саналады», – деді Айжан Есмағамбетова.
Қазіргі таңда симптомсыз вирус тасымалдаушылар арнайы байланыс құралдары арқылы бақылауға алынған.
