Ақмолада карантин кезінде 994 адамға түсіндіру жұмыстары жүргізілді, – деп хабарлайды «Aqmola news».
Бұл туралы Ақмола облысының тауарлар мен көрсетілетін қызметтердің сапасы мен қауіпсіздігін бақылау департаментінен хабарлады.
Өңірде карантин режимінің қолданылуын бақылаудың алғашқы аптасында-ақ 994 адамға түсіндіру жұмыстары жүргізілді. Өкінішке орай көптеген нысандарда төтенше жағдай режимінің бұзылғаны анықталды. Жеке кәсіпкерлер мен шаруашылық субъектілеріне қатысты 280, жеке тұлғалар бойынша 179 әкімшілік материалдар толтырылды. Мұнымен қоса 101 нысанда карантин кезіндегі қолданылуы тиіс шаралар жүргізілмеген болып шықты, – деді Ақмола облысының бас санитар дәрігері Айнагүл Мусина.
Мобильді топтарға санитарлық қызметкерлермен қоса полиция, сонымен қатар кәсіпкерлік және өнеркәсіп бөлімдерінің өкілдері қатысқан. Рейд шаралары барысында соттармен жалпы құны 88 адамға 2 243 447 теңгеге көлемінде айыппұл салынса, 47 адам қамауға алынып, 10 адамға ескерту жасалған. Қазіргі уақытта 134 материал қарастырылу үстінде.
