Ақмолада карантин кезінде малға азық ету үшін бұршақ жымқырған ауыл тұрғыны қолға түсті, – деп хабарлайды «Aqmola news» Ақмола облысының полиция департаментіне сілтеме жасап.
Оқиға Целиноград ауданында болған. 14 сәуірде жергілікті акционерлік қоғам директоры полицияға телефон шалып, кәсіпорын аумағынан 2 тоннадан астам бұршақ тұқымының ұрланғанын хабарлайды.
Жедел іздестіру шарасы нәтижесінде полиция қызметкерлері 29 жастағы Ақмол селосы тұрғынын ұстады.
Ол осы кәсіпорында жұмыс істеп жүріп, жеке көлігімен екі апта бойы қаппен бұршақ тасып алғаны белгілі болды. Бұршақтың бір бөлігін қорасындағы малға азық етсе, артылғанын ауылдастарына сатып жіберген. Күдікті кәнәсін толықтай мойындады. Қазір аталған факт бойынша қылмыстық кодекстің 188 «Ұрлық» бабы бойынша сотқа дейінгі тергеу амалдары жүргізілуде, – деді баспасөз қызметінен.
Күдіктіден келу туралы міндеттеме алынған.
