Ақмола облысында коронавирус инфекциясының таралуының 7 ошағы тіркелді. Бұл туралы өңірлік коммуникациялар қызметінде өткен брифинг барысында өңірдің бас санитар дәрігері Айнагүл Мусина мәлімдеді, – деп хабарлайды «Aqmola news» ақпарат агенттігі.
Қазіргі сәтте бізде індет жұқтырудың 7 ошағы тіркелді. Оның екеуі Целиноград ауданында, біреуі Аршалы ауданында анықталды. Бұлардың бәрі Қосшы ауылында қайтыс болған әйелден жұқтырған. Вирустың тағы екі ошағы Целиноград және Шортанды аудандарында тіркеліп, олардың Нұр-Сұлтан қаласында жұқтырғандардан таралғаны белгілі болды. Сонымен қатар Көкшетау қаласында вирус таралуының тағы бір ошағы пайда болды. Бірақ әзірге науқастың індетті қайдан жұқтырғаны белгісіз болып отыр. Коронавирус инфекциясы таралған 5 жұқтыру ошағынан науқастармен жақын қатынаста болғандар толығымен анықталды. Ал екі жұқтыру ошағында науқастармен байланыста болғандарды табу жұмыстары жүргізілуде, – деді Айнагүл Мусина.
