«Ел үлесі — пәтерге!» бастамасы осыдан біраз жыл бұрын Ақмола облысында бастау алған еді. Бүгінде бұл республикалық қайырымдылық жобаға айналды. Осы жылдары жүздеген пәтер қайырымдылық негізде мұқтаж отбасыларға тарту етілді, деп хабарлайды «Aqmola News» Ақмола облысы мешітінің баспасөз қызметіне сілтеме жасап.
Қасиетті жұма күні Ақмола облысының бас имамы Қуаныш қажы Сәбит Шортанды ауданына қарасты Новокубанка ауылының тұрғынына кезекті үйді салтанатты жағдайда тапсырды.
Аудан имамы Бақытбол Разданұлының айтуынша, жаңа қонысқа ие болған отбасының бұрынғы үйі тілсіз жау — өртке оранып, өздері далада қалған еді.
«Ауданның барлық ауыл мешіттері молдалары үн көтеріп, жылу жинауға бастама жасаған еді. Жергілікті тұрғындар да бұл бастаманы қолдап, барлығы 2 миллион 800 мың теңге қаражат жинады. Осы қаражатқа үй сатылып алынып, қасиетті жұма күні мұқтаж отбасыға сыйға тартылды, – дейді Бақытбол Разданұлы.
Сонау Монғолиядан тарихи Отанына қоныс аударған бұл отбасының елге де, имамдарға да айтар алғысы да мол.
