Шортанды ауданында «Ауыл – ел бесігі» бағдарламасы шеңберінде аудан орталығындағы стадионына күрделі жөндеу жүргізілуде, – деп хабарлайды «Aqmola News».
Жөндеу жұмыстары осы жылдың 10 шілдесінде «Байсын-А» жауапкершілігі шектеулі серіктестігімен басталған.
Қазіргі уақытта стадионға қиыршық тастар төселіп, футбол алаңының бойына бордюрлер қойылып, 400 метрлік жүгіру алаңына асфальт төселген. Сондай-ақ, синтетикалық жабу жұмыстары да басталыпты.
«Дене шынықтыру мен спортты дамытуға қамқорлық жасау – мемлекеттің әлеуметтік саясатының маңызды құрамдас бөлігі. Бүгін біздің стадионды жөндеу бойынша жүргізіліп жатқан жұмыстар жалпы ауданда спортты дамытуға серпін береді, ауданның спорттық резервін дайындауға мүмкіндік береді» – деп атап өтті аудандық дене шынықтыру және спорт бөлімінің басшысы Владимир Дьяченко.
Аудан әкімі Гайдар Қасенов жұмыс қарқынын жеделдетуді және жөндеуді көрсетілген мерзімде аяқтауды тапсырды. Сондай-ақ, ол қолданыстағы спорт ғимараттарын, әсіресе мектептер жанындағы ғимараттарды тиімді пайдалануға, дене шынықтырумен айналысу үшін аулаларды, саябақтар мен гүлзарларды жабдықтау қажеттігіне басты назар аударды.
