ҚР Білім және ғылым вице-министрі Шолпан Каринова оқушыларды бұрынғы қалыпта мектепте оқыту мәселесіне қатысты жауап берді. Вице-министрдің айтуынша, бұл туралы Денсаулық сақтау министрлігіне ұсыныс берілген.
«Мектептердің жұмысын қалпына келтіру мәселесі бізді де алаңдатады. Бұл жағдайға мұғалімдер, оқушылар, ата-аналар, бәрі алаңдап отыр. Біз мектептердің ашылуын қалаймыз. Ұсынысымызды Денсаулық сақтау министрлігіне бердік. Мектептердің жұмысын қалпына келтіру форматының бірнеше нұсқасы бар», – деп айтты ол.
Білім министрлігі мектептерді әкімдіктердің шешімімен, өңірлік санитарлық инспекторлардың келісімі бойынша ашу жайлы ұсыныс берген.
«Күн сайын Денсаулық сақтау министрлігі өкілдерімен бірге барлық мәселелерді пысықтаймыз. Жағдай әр аймақта әртүрлі. Біз мектептерді әкімдіктердің шешімі бойынша, аумақтық санитарлық инспекторлардың келісімі бойынша ашуды ұсындық. Бұл – ең дұрыс тәсіл. Біз балаларымыздың денсаулығы үшін алаңдауымыз керек. Сондықтан біз сіздерге қосымша хабарлаймыз», – деді вице-министр.
Еске сала кетейік, бүгін Мәжіліс депутаты Ирина Смирнова Білім және ғылым, Денсаулық сақтау министрліктерін сынға алып, оқушыларды дәстүрлі оқу жүйесіне қайта көшіруді талап етті.
