Күн суытқан сайын дерт дендеп, ауру асқына түсетіні белгілі. Мамандар елімізде коронавирус індетінің екінші толқыны белең алуы мүмкін деп отыр. Осыған байланысты «Aqmola News» тілшісі облыстың бас санитар дәрігері Айнагүл Мусинадан дайындық шараларын сұрап білді.
Майра ҚУАНЫШҚЫЗЫ
Батыс елдерінде коронавирус инфекциясын жұқтырғандар қатары тағы күрт көтерілді. Осыған сәйкес Қазақстанда да қауіпсіздік шаралары жасалып, дайындық жұмыстары жүргізілуде. Бас санитар дәрігердің айтуынша, облыста үш айға жететін дәрі қоры құрылған.
Облыс ауруханалары мен емдеу мекемелерінде қосымша керек медикаменттер, өкпені жасанды желдету аппараттары, оттегі концентраттары сатып алынды. Қазір 2 оттегі станциясы жеткізіледі деп күтілуде. Сонымен бірге бөлшек саудадағы дәрілердің қаншалықты жеткілікті екендігін анықтап, үнемі мониторинг жүргізудеміз., – дейді Айнагүл Мусина.
Облыстың бас санитары арнайы мониторингтік топ өкілдерімен бірге дәріханалардағы дәрі-дәрмек бағасына да мониторинг жүргізді .
Алдымен қаладағы ірі «Арша» дәріханалар желісіне ат басын бұрдық. Мұнда дәрі-дәрмек бағасы өскенімен дәрі-дәрмек қоры жеткілікті екені анықталды. Мониторингтік топ өкілдерімен бірге одан әрі де бірнеше дәріханаларды аралап , қажетті дәрілердің қаншалықты қамтамасыз етілгендігініне назар аудардық. Індет өршіген жағдайда дәрі-дәрмек қоры жеткілікті екенін байқадық., – деді облыстың бас санитар дәрігері.
Соңғы мәліметтер бойынша облыста коронавирус індетін жұқтырып, емделіп жатқандар саны – 251 адам. Дегенмен, өңірдегі көптеген провизорлық және инфекциялық стационарлар жабылған. Ал қауіпті жағдай қайталанған жағдайда стационарлар қайтадан науқастарды қабылдауға әзір.
