Ақмола облысында осы жылдың 7 айының қорытындысы бойынша тауар өнімі өндірісі 394 миллиард теңгені құрады. Бұл өткен жылдың дәл осы кезеңімен салыстырғанда 4,1 пайызға артық болып отыр, – деп хабарлайды «Aqmola News».
Майра ҚУАНЫШҚЫЗЫ
Өңірдегі өнеркәсіп өндірісінің даму қарқыны жайлы Ақмола облыстық өнеркәсіп және кәсіпкерлік басқармасы басшысының орынбасары Александр Загребин мәлім етті.
Басқарма басшысының айтуынша, өңірде карантин шектеулеріне қарамастан өнім өндіру көлемі төмендемеген. Әсіресе, компаниялардың инвестициялық белсенділігі жоғарылаған.
Кәсіпкерлікті қолдау картасы шеңберінде өңірде құны 13 миллиард теңгеден астам сомаға бағаланатын 13 жоба жүзеге асады. Сонымен қатар 2025 жылға дейін жүзеге асырылатын 70 перспективалық инвестициялық жобаларды жүзеге асыру көзделіп отыр, – дейді Александр Загребин.
Жалпы, жылдың жеті айында ғана облыс экономикасына тартылған негізгі капиталға инвестиция көлемі 202 миллиард теңгені құраған. Бұл өткен жылдың ұқсас кезеңімен салыстырғанда 25 пайызға артық .
