Облыста эпидемиологиялық жағдай әлі де тұрақталмай тұр. Соңғы деректер бойынша облыста коронавирус инфекциясын жұқтырғандардың жалпы саны 1769 адамға жетті, – деп хабарлайды «Aqmola News».
Майра ҚУАНЫШҚЫЗЫ
Бұл туралы Ақмола облысы тауарлар және көрсетілетін қызметтердің сапасы мен қауіпсіздігін бақылау департаменті мәлім етті.
Зертханалық расталған вирус жұқтырғандардың саны 1769 адамға жетті. Олардың 635 ауру белгілері болса, қалған 1134-і симптомсыз науқастар қатарына жатады. Осы уақытқа дейін 23 адам бақилық болған. Науқасқа шалдыққандардың 752-сі ауруды осыған дейін жұқтырғандармен жақын қатынаста болғандар болса, 409 ақмолалық медициналық мекемелерге өздері жүгінгені белгілі болды.
Тек соңғы тәулікте ғана облыста 42 адамнан COVID-19 расталды. Ал 8 шілдеден 14 шілдеге дейінгі соңғы аптада коронавирус жұқтырғандардың өсімі 2,3 пайыз болып, 257 адам тіркелген. Өткен аптамен салыстырғанда 1,03 пайызға төмендеді. Науқастармен жақын қатынаста болған 94 адамнан және профилактикалық тексеру шаралары кезінде 86 адам және өзі жүгінген 77 адамнан вирус анықталды, – дейді облыстың бас санитар дәрігері Айнагүл Мусина.
Жалпы аудандар бойынша Сандықтау ауданында эпидемиологиялық ахуал күрт төмендеген. Мұнда коронавирус жұқтырушылардың саны 11 есеге өскен. Сондай-ақ, Зеренді ауданында 8 есе, Атбасар ауданында 3,5 есе, Біржансал ауданында 2,3есе, Бұланды ауданында 2 есе және Аршалы ауданында 1,3 есе көбейгені байқалған.
