13 шілде – Ұлттық Аза тұту күніне орай Нұр-Сұлтан қаласы уақыты бойынша 12.00-де коронавирус инфекциясынан қайтыс болғандарды еске алуға арналған бір минут үнсіздік жарияланады. Бұл туралы Ақпарат және қоғамдық даму министрлігі телеграм-каналында хабарлады.
«2020 жылдың 13 шілде Жалпыұлттық аза тұту күні Нұр-Сұлтан уақыты бойынша сағат 12:00-де коронавирус індетінен қайтыс болған азаматтарды еске алу үшін бір минуттық үнсіздік жарияланады.
«Жалпыұлттық азалы үнсіздік» шарасын «Qazaqstan» Ұлттық арнасы 11:55-тен бастап тікелей эфирде көрсетеді.
Аза тұту күнінде «Хабар агенттігі» АҚ, «Қазақстан» телерадиокорпорациясына қарасты теле,-радиоарналар және басқа да республикалық, аймақтық телеарналар мен радиоарналар эфир кестесін толықтай өзгертеді. Барлық ойын-сауықтық бағдарламалар алынып, жарнамалық контент толығымен тоқтатылады. Бұрынғы кестеден тек ақпараттық бағдарламалар ғана эфирге шығады» – деп жазылған хабарламада.
