Дәстүрге айналған «Еңбек жолы» республикалық байқауы Ақмола облысының жұмысшы кәсіптерінің өкілдерін қайта біріктірді. «Жалпыға Ортақ Еңбек Қоғамы» идеясын насихаттауға және еңбекке деген құрметті нығайтуға бағытталған бұл жыл сайынғы байқау өңірдің дамуына елеулі үлес қосқан талантты мамандар мен еңбек әулеттерін тағы да анықтады. 2016 жылдан бастап «Еңбек жолы» жұмысшы мамандықтарының үздік өкілдерін құрметтеу үшін маңызды алаң болып табылады. Байқау еңбеккерлердің еңбегін атап өтіп қана қоймай, жастардың еңбекке деген құрметін, ұрпақтар сабақтастығын және кәсіби өсуге деген ұмтылысын тәрбиелеуге арналған, деп хабарлайды ішкі саясат басқармасы.
Биылғы байқаудың өңірлік кезеңі «Үздік еңбек әулеті», «Өндірістің үздік жас қызметкері» және «Жұмыс істейтін жастардың үздік тәлімгері» атты үш негізгі номинация бойынша өткізілді. Додаға барлығы 52 қатысушы қатысып, өз шеберліктері мен еңбектегі жетістіктерін паш етті.
Бағалаудың әділдігі мен ашықтығын қамтамасыз ету мақсатында облыс әкімінің орынбасары Алтынай Әміренованың төрағалығымен Конкурстық комиссия құрылды. Оның құрамына жұмыспен қамтуды үйлестіру және әлеуметтік бағдарламалар басқармасының, Мемлекеттік еңбек инспекциясының, аумақтық кәсіподақ бірлестіктері мен кәсіпкерлер қауымдастығының өкілдері енді. Комиссия мүшелерінің басты міндеті – байқауға қатысушылар арасынан ең лайықты үміткерлерді анықтау болды.
«Еңбек жолы» байқауы – облысымыздың болашағын табандылығы мен адалдығы арқылы қалыптастырып жүрген еңбек адамдарының еңбегін бағалап, олардың үлесін дәріптеуге зор мүмкіндік», – деп атап өтті облыстық Жұмыспен қамтуды үйлестіру және әлеуметтік бағдарламалар басқармасында.
«Үздік еңбек әулеті» номинациясында қазылар алқасының шешімімен Левковский әулеті жеңімпаз атанды. Үш ұрпақтың өкілдері жалпы 171 жылдық еңбек өтілін жинақтап, өмірлерін теміржол саласына арнаған. Әулет мүшесі, «ҚТЖ-Жүк тасымалы» ЖШС Ерейментау филиалының инженер-технологы Ольга Владимировна Филиппенкова сабақтастық пен кәсібиліктің жарқын үлгісін көрсетті. Екінші орын 140 жылдан астам уақыт бойы «Бестөбе кеніші» кәсіпорнында еңбек еткен Беккер отбасына бұйырды. Ал үшінші орынды «Қаражон» ЖШС-де 93 жыл бойы табанды еңбек еткен Босенко әулеті иеленді.
«Жұмыс істейтін жастардың үздік тәлімгері» номинациясында 37 жылдық еңбек өтілі бар «Қазақтелеком» АҚ кадрлар жөніндегі әкімшісі Несібелді Жүсіпова жеңімпаз атанды. Оның кәсіби біліктілігі мен адалдығы жас мамандарға нағыз үлгі болды. Екінші орын «Степногор подшипник зауыты» АҚ қызметкері Қарақас Қасеноваға берілсе, үшінші орынға «Гормолзавод» ЖШС қызметкері Гүлнара Түктағұлова лайық деп танылды.
«Өндірістің үздік жас қызметкері» номинациясында бар болғаны бір жыл еңбек етіп үлгергенімен, өз қабілеті мен жауапкершілігін айқын танытқан «Семізбай-U» ЖШС-нің химиялық талдау зертханашысы Аяжан Жамкенова жеңімпаз атанды. Екінші орын Көкшетау қалалық білім бөлімінің қызметкері Мадияр Борамбайға, ал үшінші орын «Степногор подшипник зауыты» АҚ-ның жас маманы Михаил Плотниковқа бұйырды.
Өңірлік кезеңнің жеңімпаздары өз жетістіктерімен лайықты танылып, енді байқаудың келесі сатысы – республикалық деңгейде бақ сынауға дайындалуда. Жеңімпаздар туралы материалдар Қазақстан Республикасының Еңбек және халықты әлеуметтік қорғау министрлігіне жолданып, олар еліміздің үздіктері атағы үшін күресетін болады.
