Әлеуметтік желілерде «KEGOC» акционерлік қоғамының Көкшетау қаласындағы бас электр станциясында жөндеу жұмыстарының жүргізілуіне байланысты Көкшетау қаласында 14 мамыр күні таңғы 9.00-ден кешкі 21.00-ге дейін электр энергиясы ажыратылады деген ақпарат жалған болып шықты, – деп хабарлайды «Aqmola news».
Бұл туралы «Көкшетау Энерго Орталығы» жауапкершілігі шектеулі серіктестігі мәлім етті.
Құрметті «Көкшетау Энерго Орталығы» ЖШС тұтынушылары! Әлеуметтік желілерде және Whatsapp мессенджерінде электр энергиясын берудің шектелетініне қатысты таралған ақпарат шындыққа жанаспайды. Хабарландыруда көрсетілген «Энергопромкомпания» жауапкершілігі шектеулі серіктестігі компаниясы біздің ұйымға ешқандай қатысы жоқ. Аталған компания вокзал маңы, Бірлік шағын ауданы тұтынушыларын ішінара және Станционный кентіне толықтай қызмет көрсетеді. Ал, «Көкшетау Энерго Орталығы» ЖШС тұтынушыларына электр энергиясын беруде шектеу болмайды, – деді энергияны тарату кәсіпорнынан.
Естеріңізге сала кетейік, осыған дейін әлеуметтік желілерде және Whatsapp мессенджерінде электр энергиясын таратудың шектелетіні туралы ақпарат тараған.
