Биыл Ақмола облысының белді журналисті, публицист, жазушы-драматургы, қоғам қайраткері Жабал Ерғалиұлының 70 жас мерейтойына арналған алғашқы кеш өтті.
Көкшетау облыстық «Көкшетау правдасы» газетінде кіші әдеби қызметкері болып еңбек жолын бастаған Жабал Ерғалиұлы Қазақстан Республикасы Парламенті Сенатының депутаты лауазымына дейін көтерілді.
Ақмола облысы және Көкшетау өңірінің тарихында тұңғыш рет «Көкшетау» әдеби-көркем, қоғамдық-саяси журналын шығаруды ұйымдастырды.
Бүгін зиялы қауым өкілдері, студенттер, курсанттар, БАҚ өкілдерінің қатысуымен «Елім деп соққан жүрегім» атты мерейтой иесімен кездесу өтеді. Шараға өңірдегі зиялы қауым өкілдері қатысып, мерейтой иесі туралы жағымды пікірлерімен бөлісті.
«Жабал Ерғалиұлының 70-жылдық мерей-тойы бүгін достық үйінде басталып жатқанына қуаныштымыз. Жабал Ерғалиұлын қоғам қайраткері, жазушы, драматург ретінде халық жақсы таниды. Депутат, газеттердің бас редакторы болып жүрген кезде талай өзекті мәселелерді қозғап, елдің қамын, халықтың жағдайын ашық айтып, жазып жүрді. Сенатта көпшілік алдында елдің жағдайын бүкпесіз батыл айта білген бірден бір депутат. Көп проблемалар Жабал Ерғалиұлының бастамаларының арқасында шешілді. Бұрынғы Енбекшілдер ауданына Біржан сал атын берілуіне сіңірген еңбегі де зор. Өйткені, Жабал ағамыз сол жылдары Премьер-Министр болған Бақытжан Сағынтаевқа арнайы хат жазып, барып ауданға ұлы ақын және композитор Біржан сал атын берілуі қажет деген»,- деді «Қоғамдық келісім» КММ директоры Ермек Нұғманов.
Ең басты шара – Жабал Ерғалиұлының 70 жылдық мерейтойына орай республикалық театр фестивалі 27-30 қазан аралығында Ш.Құсайынов атындағы қазақ музыкалық-драма театрында өтеді.
Мерейтойды мерекелеу аясында Ақмола облысында 100-ден астам түрлі форматтағы іс-шаралар жоспарланған: мерейтой иесімен мерекелік кездесулер, оқырмандар конференциясы, көрмелер, өңірлік айтыс, Қазақстанның жетекші театрларының қатысуымен республикалық театрлар фестивалі. Фестиваль аясында Қазақстанның әр өңірлерінен келген театр ұжымдары Жабал Ерғалиұлының қойылымдарын сахналайтын болады.
Сонымен қатар, фестиваль аясында Шахмет Құсайынов атындағы қазақ музыкалық драма театры драматургтың шығармашылығы бойынша қойылым тұсаукесері өтеді.
