Көкшетауда тағы бір бала ашық тұрған терезеден құлап кетті. Жыл басынан бері Ақмола облысында бұл төртінші оқиға болып отыр, деп хабарлайды «Aqmola News».
Оқиға 20 мамыр күні кешкі жетілер шамасында болған. Көкшетау қаласы полиция басқармасының хабарласқан тұрғын МПС көшесі 28 мекенжайындағы екінші қабаттың терезесінен кішкентай баланың құлап кеткенін хабарлаған.
«4 жасар қыз бала 10 жастағы ағасымен үйде қалған. Бұл кезде балалардың ата-анасы емханаға кетіпті. Ағасы жуыну бөлмесінде болған кезде қарындасы терезеге шығып, байқаусызда құлап кеткен. Абырой болғанда қыз аман қалды. Денесінде сынықтары мен көгерген жері жоқ. Қазіргі уақытта жағдайы тұрақты», – дейді Ақмола облысы полиция департаментінің баспасөз қызметінің жетекшісі Гүлнәр Пинчук.
Полиция қызметкерлері мұндай оқиғалардың ата-аналардың немқұрайдылығынан туындайтынын тағы бір мәрте ескер салды.
«Құрметті ата-аналар, егер балаларыңыз болса, терезелерді ешқашан ашық ұстамаңыз. Баланың терезе үстіне шығуына жол бермеңіз. Терезелердің алдында барлық жиһазды алып тастау керек. Балаларды қараусыз қалдырмаңыздар»,-дейді полиция қызметкерлері.
