Ақмола облысының әкімі Марат Ахметжанов Көкшетау қаласының іргесінде орналасқан Бірлік елді мекеніндегі су басқан №22 жалпы білім беретін мектепке барып, ондағы төтенше жағдайдың салдарын көрді.
Су тасқынының себебі – тартылған электрлік коммуникация саңылаулардың герметикалығының болмауы. Жұмылдырылған күштер мен құралдар еріген суды сору жұмыстарын жедел жүргізді. Мектеп материалдық тұрғыдан зардап шеккен жоқ. Қазіргі уақытта мектептің жертөлесі қанағаттанарлық жағдайда. Көкшетау қаласының әкімдігі мектеп ауласы мен сыртында су сору жұмыстарын жүргізді.
Нысанды қарап шыққаннан кейін өңір басшысы су тасқыны жағдайын тәулік бойы бақылауды күшейтуді тапсырды. Аудандар мен қалалардың әкімдеріне барлық мектептер мен басқа да әлеуметтік нысандарды аралап шығу жүктелді. Сондай-ақ, елді мекендерден қар шығару, су өткізу құрылыстарын, көпірлерді, арықтар мен каналдарды тазарту бойынша белсенді жұмысты жалғастыруды тапсырды.
Биылғы 20 наурыздан бастап облыстың жергілікті атқарушы органдарының барлық деңгейлерінде су тасқынына қарсы штабтардың жұмысы ұйымдастырылды. Коммуналдық қызметтер күшейтілген жұмыс режиміне көшті.
