Атбасар қаласында адам ұрлау фактісі бойынша жедел іздестіру шараларын ұйымдастырған полицейлер күдіктілерді іздеп тауып қылмыстық іс қозғады, деп хабарлайды «Aqmola News» Ақмола облысы полиция департаментінің баспасөз қызметіне сілтеме жасап.
33 жастағы ер адам Атбасар аудандық ауруханасына 25 тамыз күні бас сүйегінде жабық ми жарақаты және ми шайқалуы диагнозымен түскен. Аталған факт бойынша дереу жедел іздестіру шараларын жүргізген. Күдіктілер ізі суымай-ақ табылды. Адам ұрлау фактісі бойынша Атбасар қаласының екі тұрғыны күдікті ретінде ұсталды.
«Тергеу барысында жәбірленушіні гаражда ұстап дене жарақаттарын салғаны анықталды. Ұсталған 33 және 40 жастағы екі адам осыған дейін де қылмыстық кодекстің 194 және 188 бабы бойынша сотталған болып шықты», – дейді полицияның баспасөз қызметінен.
Қазіргі уақытта аудандық полиция бөлімінің тергеу бөлімі ҚР ҚК 125-бабының 2-бөлігі «Адам ұрлау» бойынша сотқа дейінгі тергеу амалдарын бастады. Күдіктілер уақытша ұстау изоляторына қамалды. Тергеу амалдары жалғасып жатыр.
