Көкшетауда бүгін Боровской шағын ауданындағы көп қабатты үйдің 9-шы қабаттағы балконынан өрт шықты. Пәтерде үй иелері болмағандықтан өрт сөндірушілер сырттан автосаты қолданып 35 адамды өрттен эвакуациялады, деп хабарлайды «Aqmola News» тілшісі.
Тұрғын үйден өрт шыққаны туралы жедел басқару орталығындағы пультке күндізгі 12.10-да хабарлама түскен. Дереу оқиға орнына өрт сөндіруші жедел топ аттанған.
«Өрт балкондағы тоғыз шаршы метрді шарпығаны анықталды. Өрттен 35 адамға эвакуация жасалды. Өрт сөндірушілердің жедел әрекетінің арқасында арада 6 минут өткенде тілсіз жау ауыздықталды. Абырой болғанда зардап шеккендер мен құрбан болғандар болған жоқ. Қазір өрттің шығу себептері анықталып жатыр», – деді Ақмола облысы төтенше жағдайлар департаментінің баспасөз қызметінен.
Өртті сөндіруге 5 өрт сөндіру техникасы мен жеке құрамның 14 сарбазы жұмылдырылған.
