Бүгін «Nur Otan» партиясы Ақмола облыстық филиалының қоғамдық қабылдау бөлмесінде облыстық денсаулық сақтау басқармасы жетекшісінің орынбасары Нұрлан Шагиров тұрғындарды жеке мәселелері бойынша қабылдап, олардың арыз-шағымдарының оңтайлы шешілуіне ықпал етті,-деп хабарлайды «Aqmola News»ақпарат агенттігі.
Мәселен, ІІ топтағы мүгедек А.В.Ирлыкова тегін дәрі-дәрмекпен қамту өтінішімен келген еді. Оның бірнеше дертке душар болғаны ескеріліп, мәселесінің оңтайлы шешілуіне көмектесіп, дәрі «Реабилитация Авиценна» ЖШС емханасы есебінен тегін берілетін болды.
Мүгедектікті рәсімдей алмай, салдарынан қажетті дәрілерін тегін алудан қағылып отырған зейнеткер Ж.С. Келісовтің де мәселесі шешілді. «VIAMEDIS» ЖШС емханасы қарттың дәрілерін үйіне жеткізіп беретін болды.
Анасы үшін шырылдап келген А.К. Ілиясованың да мәселесі оң шешімін тапты.
Жалпы, «Nur Otan» партиясының қоғамдық қабылдауына деген халықтың сенімі күннен-күнге артып келеді. Партия билік пен халық арасындағы дәнекер болып, халықты біріктіретін саяси күшке айналды. Нәтижесінде түрлі мазмұндағы өтініштерімен, арыз-шағымымен, тіпті ұсыныстарымен келетін тұрғындардың мұң-мұқтажына құлақ түріп, олардың мәселелерінің оңтайлы шешілуіне барынша мүмкіндік жасайды. Көмекке зәру жандарды қамқорлығына алады.
