Үкімет басшысы Асқар Мамин Қарағанды фармацевтикалық кешеніне барып, Қазақстан мен Ресей президенттері арасындағы уағдаластықты іске асыру аясында «Спутник V» вакцинасын өндіруді бастап берді.
Қазақстанда 2021 жылдың ақпанынан бастап ерікті түрде жаппай вакцинация басталады.
Кешен базасында кезең-кезеңімен 2 млн доза вакцина өндіріледі.
«Қазақстанда өндірілген «Спутник V» екпесін жаппай егу 2021 жылғы ақпан айында басталады. Бірінші кезекте екпе ерікті негізде медицина қызметкерлері, педагогтер, студенттер, құқық қорғау органдарының қызметкерлері, медициналық-әлеуметтік мекемелердің контингенті, сондай-ақ созылмалы ауруы бар қауіптілік топтарының өкілдеріне салынады», – деді Премьер-министр.
Еске салайық, 19 желтоқсанда отандық QazCovid-in вакцинасын клиникалық сынақтан өткізудің соңғы ІІІ сатысы басталды. Оның шеңберінде 3 мың ерікті азаматқа екпе егілуде.
