Ақмола облысында ауыл шаруашылығы машиналарын жасау, азық-түлік өнеркәсібі және құрылыс индустриясы саласында 7 инвестициялық жоба жүзеге асырылмақ. Бұл туралы облыс әкімдігінде индустриялық-иннвациялық даму жөніндегі үйлестіру кеңесінің жиынында мәлім болды, – деп хабарлайды «Aqmola News».
Облыс әкімінің орынбасары Қанат Ыдырысовтың төрағалығымен өткен жиын барысында үйлестіру кеңесі ұсынылған жаңа инвестициялық жобалар кәсіпкерлікті қолдау картасына қосуға шешім қабылдады. Аталған жобалар бойынша жалпы инвестиция сомасы 22,3 миллиард теңгені құрап отыр.
Жаңа жобалар жүзеге асырылса облыста 400-ге тарта жаңа жұмыс орындары құрылмақ. Оның ішінде, Көкшетау қаласында құны 14,4 миллиард теңгені құрайтын «Kaz Rost Engineering Ltd» компаниясының жылына 500 ауыл шаруашылығы техникаларын шығаруға қуатты кәсіпорны мен Шортанды ауданында 1,2 миллиард теңге сомасына жылына 4500 тонна сүт өңдейтін «MilkProduct» зауытын салу көзделіп отыр, – дейді Ақмола облысы кәсіпкерлік және өнеркәсіп басқармасының басшысы Ербол Оспанов.
