Көкшетау қаласының іргесіндегі Красный Яр селосындағы төрт қабатты үйлердің бірінің электр қалқанынан өрт шыққан. Салдарынан 22 адам қауіпсіз жерлерге көшіріліп, үш адам құтқарылды, – деп хабарлайды «Aqmola News» Ақмола облысының төтенше жағдайлар департаментінің баспасөз қызметіне сілтеме жасап.
«Өрт шыққан жерге облыстық төтенше жағдайлар департаменті жеке құрамының 15 сарбазы мен 4 техника бірлігі жұмылдырылған. Өрт таңғы 07.50-де ауыздықталып, 8-12-де толықтай сөндірілді. Өрт кезінде қалып қойған үш адам қалып қойды. Оның екеуі балалар. Алдын ала болжамдарға сәйкес өрт электр сымдарының қысқа тұйықталуынан болған. Абырой болғанда өрттен зардап шеккендер болған жоқ, – дейді Көкшетау қалалық төтенше жағдайлар басқармасының бастығы Әсет Жақсылықов.
Төтенше жағдайлар департаменті жылу маусымы басталар алдында өрттен сақтану үшін пеш және электр сымдарының дұрыстығын мұқият тексеру қажеттігін ескертеді.
