«Жас ұлан» бірыңғай балалар мен жасөспірімдер ұйымы «Birgemiz:Asyl Mura» жалпыұлттық жобасы аясында «АЛЖИР» музейіне барып, жөндеу жұмыстарына қатысты,- деп хабарлайды «Aqmola News».
«Жас ұлан» бірыңғай балалар мен жасөспірімдер ұйымының баспасөз хатшысы Серік Бағланның айтуынша, мұндағы негізгі мақсат – мәдени-тарихи мұраны сақтау және дамыту, тарих, мәдениет ескерткіштері мен мемориалдық кешендерді қалпына келтіру.
«Алжир» музейі еліміздегі маңызды тарихи-мәдени орындардың бірі. Бұл жерде қаншама әжелеріміз, аналарымыз жазықсыз азапталып, көз жұмды. Осындай киелі жерді реставрациялау үшін «Birgemiz: Asyl Mura» жалпыұлттық жобасының 10 волонтері жұмылдырылды. Музей қызметкерлерінің нұсқауымен волонтерлер сол жердегі экспонаттардың шаңдарын сүртіп, тазалық жұмыстарын жүргізді. Бұл жұмыстар жастар арасында қол еңбегін насихаттауға көмектеседі деп ойлаймын», – дейді «Жас ұлан» бірыңғай балалар мен жасөспірімдер ұйымының төрайымы Динара Сәдуақасова.
Алдағы уақытта реставрациялық жұмыстар аяқталғаннан кейін волонтерлер үшін музейге арнайы экскурсия жүргізілмекші.
