Ақмола облысында 13 жасар қыздың із-түзсіз жоғалуына байланысты «Адам өлтіру» бабы бойынша сотқа дейінгі тергеу амалдары жүргізілуде, деп хабарлайды «Aqmola News» тілшісі облыстық ПД баспасөз қызметіне сілтеме жасап.
Ведомствоның мәліметінше, із-түзсіз кеткен жасөспірім Әйгерім Хайдарованы іздестіру жұмыстары сегіз күннен бері жүріп жатыр.
«Осыған байланысты Қылмыстық кодекстің 99-бабы «Адам өлтіру» бойынша іс қозғалып, сотқа дейінгі тергеу амалдары басталды. Жасөспірімді жоғалған күні көруі мүмкін 200-ден астам куәгерден жауап алынды», – дейді ведомстводан.
Еске сала кетейік, 21 тамызда Көкшетау қалалық ПБ кезекшілік бөліміне жоғалған қыздың анасы жүгінген. Анасының айтуынша, Әйгерім 20 тамыз сағат 15:00 шамасында Нұрлы көш ауылында тұратын үйден шығып, шаштаразға кеткен. Содан қайтып оралмаған, ұялы телефоны өшірулі, қайда екені белгісіз. Полиция қызметкерлері атап өткендей, іздестіру жұмыстарына 100-ден астам полиция, 20-дан астам құтқарушы және 30-дан астам Ұлттық гвардия 5510 әскери бөлімінің сарбазы, 350 волонтер жұмылдырылған.
«Аталған іс Ақмола облыстық ПД бастығының жеке бақылауында», – деп толықтырды ведомстводан.
