Ақмола облысының құтқарушылары «Жаз-2020» оқу-жаттығуларына әзірленуде, – деп хабарлайды «Aqmola news» Ақмола облысының төтенше жағдайлар департаментінің баспасөз қызметіне сілтеме жасап.
Қазір Ақмола облысының аумағында өрттің қауіпті кезеңі басталды. Орман қорын өрттен қорғауды қамтамасыз ету мақсатында сәуірдің басында өңірге әлемдегі ең ірі МИ-26 тікұшағы жеткізілген.
Қазір Елорда мен Алматы қаласынан Көкшетауға келген пилоттар ауысыммен жұмыс істеуде. Бір ауысым бір айға дейін қызмет етеді. Қазір пилоттар мен құтқарушылар «Жаз-2020» оқу-жаттығуларына әзірленуде, – деді департаменттің баспасөз қызметінен.
Ақмола облысының бірнеше ауданында қалың қарағайлы-қайыңды ормандар баршылық. Ал, шағын ғана орман өртінің қауіпті болатыны соншалық жасыл желекті қалпына келтіру үшін ондаған жылдар кетеді. Бұл қоршаған ортаға орасан зор зиянын тигізіп, ал мемлекет қыруар экономикалық және экологиялық шығынға ұшырайды.
Жыл басынан бері ғана өңірде төрт орман өрті мен құрғақ шөптің тұтануынан 17 далалы аймақ отқа оранды.
