Ақмола облысының шаруалары алдағы көктемгі егіс науқанына белсенді дайындық үстінде. Облыс әкімдігінде өткен Аграрлық кеңестің алғашқы отырысында өңірдің егіс жұмыстарына дайындығы, оның ішінде тұқым сапасын бақылау мен агротехнологияларды сақтау мәселелері қаралды.
Ақмола облысы – еліміздің аграрлық саласындағы жетекші аймақтардың бірі. Өңірде өсімдік шаруашылығы агроөнеркәсіп кешенінің негізін құрайды. Биылғы көктемгі дала жұмыстарының сапасын арттыру мақсатында аймақта арнайы агрономиялық кеңес жұмыс істеп, тұқым сапасы мен агротехнологиялық талаптардың сақталуын қадағалайды.
Биыл егіншілер 5,4 миллион гектар ауыл шаруашылығы жеріне дән себуді жоспарлап отыр. Бұл өткен жылмен салыстырғанда 48,1 мың гектарға артық. Сондай-ақ картоп пен көкөніс егілетін алқаптар кеңейіп, тиісінше 7,8 мың және 1,4 мың гектарды құрады.
Жергілікті ауыл шаруашылығы тауар өндірушілері жеңілдетілген жанар-жағармаймен қамтылуда. Көктемгі дала жұмыстарына 83 мың тоннаға жуық жанармай бөлінді. Ауыл шаруашылығы тауар өндірушілері үшін дизель отынының бағасы 254 теңге болып белгіленді, бұл нарықтық бағадан 15%-ға төмен.
«Шаруалар «Кең Дала» және «Кең Дала – 2» жеңілдетілген несие беру бағдарламаларын белсенді пайдаланып келеді. Жылдық мөлшерлемесі 5%-ды құрайтын бұл бағдарламалар арқылы биыл көктемгі дала жұмыстарына қаржылай қолдау ертерек көрсетіле бастады. Бүгінгі таңда 96,5 млрд теңгені құрайтын 606 өтінім түсті, оның ішінде 65,9 млрд теңгеге 413 өтінім мақұлданды. Тұқымдық материалды дайындау ісі де қарқынды жүріп жатыр. Қазіргі уақытта 540,2 мың тонна тұқым дайындалды. 2025 жылы минералды тыңайтқыштар себілетін егістік алқабын 78 мың гектарға ұлғайту жоспарлануда. Бүгінде аграршылар отандық өндірушілермен 66,9 мың тонна тыңайтқыш жеткізу бойынша 266 келісімшарт жасасты», – деп мәлімдеді Ауыл шаруашылығы және жер қатынастары басқармасының басшысы Нұрбек Бадыраков.
Көктемгі егіс науқанына техникалық дайындық та жоғары деңгейде. Қазіргі таңда өңірдегі ауыл шаруашылығы техникаларының дайындығы 100%-ды құрайды, ал алдағы дала жұмыстарына 37 мың техника жұмылдырылады.
Аграрлық кеңесте селекция, тұқым шаруашылығы, техникалық жабдықтау және қаржыландыру мәселелері талқыланып, өнімділікті арттыру мен өңірдің азық-түлік қауіпсіздігін қамтамасыз етуге бағытталған маңызды шешімдер қабылданды.
