Облыстық әкімдікте облыс әкімінің төрағалығымен облыс орталығындағы қатты тұрмыстық қалдықтарды шығару мәселелеріне арналған кеңес өтті.
Марат Ахметжанов кеңесті ашып қаланың коммуналдық қызметтері өздерінің тікелей міндеттерін атқара алмай отырғанын атап өтті.
«Бүгінде контейнер алаңдарынан қоқыс дер кезінде шығарылмайды, бұл облыс орталығы тұрғындарының көптеген шағымдарын туғызуда. Көкшетау қаласы әкімдігінің қызмет көрсетушілердің келісім-шарттық міндеттемелерін орындауына бақылауы әлсіз екенін атап өтемін», – деді өңір басшысы.
Айта кетсек, ҚТҚ орталықтандырылған жинау жүйесін ұйымдастыру мақсатында Көкшетау қаласының әкімдігі қатты тұрмыстық қалдықтар нарығында қалдықтарды жинайтын және тасымалдайтын қатысушыларды анықтау бойынша конкурс өткізді.
Байқау қорытындысы бойынша Көкшетау қаласында осы қызметті жүзеге асыратын 3 кәсіпорын анықталды – «ҚТҚ операторы: Көкшетау» ЖШС, «ЭКО-ДУМП» ЖШС, «Clean City Aktobe» ЖШС.
Қала бойынша барлығы 239 контейнер алаңы орнатылған. Оларды жаңғырту жұмыстары жүргізілуде.
Кеңестің қорытындысы бойынша Көкшетау қаласының әкімдігіне қатты тұрмыстық қалдықтарды уақытында шығармағаны үшін шарттық міндеттемелер аясында қызмет көрсетушілерге қатысты барлық қажетті шараларды қолдану, мердігер ұйымдардың шарттық міндеттемелерді орындауын тұрақты бақылауды және күнделікті бақылауды қамтамасыз ету тапсырылды.
Сонымен қатар, өңір басшысы орынбасарларына тағы да қаланы аралауды тапсырды. Жағдай жақсы жағына өзгермесе, жауаптылар тәртіптік жауапкершілікке тартылады.
