Атырауда 6-7 желтоқсанда өткен білім беру ұйымдары басшыларына арналған IІІ Республикалық «Director`s CUP» дебат турнирі өз мәресіне жетті.
Төрешілердің шешімі бойынша Ақмола облысы мен біздің ауданымыздың намысын қорғаған Щучинск қаласының № 7 мектеп-лицейінің директоры Дамир Шоқанұлы Сураганов және Зеленый бор ауылының мектеп-гимназиясының директоры Мейрамбек Құдайбергенұлы Рахымжанов құраған Бурабай ауданының командасы еліміздің мұнай астанасында жүлделі I орынға ие болды. Дамир Шоқанұлы «Үздік спикер» номинациясының жеңімпазы атанды.
Айта кетейік, турнирге биыл республика бойынша 52 мектеп басшыларынан құралған 21 команда қатысты.
Турнирдің мақсаты – мектеп басшыларының көшбасшылық қабілетін, зияткерлік әлеуетін дамыту, өзекті қоғамдық саяси тақырыптарды талқылауға тарту арқылы олардың азаматтық көзқарастарын дамыту және конструктивті диалог пен пікірталасты жүргізу мәдениетін қалыптастыру.
Жеңімпаздарымызды құттықтаймыз!
