Егіндікөл ауданының тұрғындарына магистральдық желілердегі апаттарға байланысты ауыз суын беруде іркілістер орын алды. Ағымдағы жылдың мамыр айында жергілікті көлемдегі төтенше жағдай жарияланды.
Егіндікөл, Қорғалжын және Атбасар аудандарында сумен жабдықтау мәселесін шешу Президенттің облыс әкімін тағайындау кезіндегі алғашқы тапсырмаларының бірі болды.
Өңір басшысы Марат Ахметжановтың басшылығымен комиссия құрылды, оның құрамына ҚР Су ресурстары және ирригация министрінің орынбасары, Су ресурстары комитетінің төрағасы, Қорғалжын, Егіндікөл аудандарының әкімдері, облыстық ТҮКШ басқармасының басшысы, Нұра топтық су құбырының өкілдері және басқа да мүдделі адамдар кірді.
Трассаның жаңа учаскелерін негізгі учаскелерге қосу бойынша нақты іс-қимыл жоспары әзірленді және қосылу мерзімдері келісілді.
16 қыркүйекте облыс әкімінің шақыруымен ауданға Су ресурстары және ирригация министрі Нұржан Нұржігітов келді. Сол жерде құбырдың сыни магистральдық бөлігін ауыстыру технологиясын өзгерту туралы жедел шешім қабылданды.
Ұзындығы 337 км құрайтын су құбыры Егіндікөл, Қорғалжын және Атбасар аудандарының 24 елді мекенін сумен жабдықтаудың көзі болып табылатынын атап өту қажет.
Су құбырын реконструкциялау жалғасуда. Ол жерде бірден екі мердігер ұйым жұмыс істеуде. 42 км ор қазылды. 11,2 км астам құбыр төселді, оның ішінде ұзындығы 6 км қолданыстағы полиэтилен құбырын қайта кесу арқылы 5,5 км ауыстырылып пайдалануға берілді, осыған байланысты негізгі Сабынды су құбырынан 11 км жалпы қашықтығымен магистральды су құбырында мәселе шешілді.
Кеше Егіндікөл ауылы тұрғындарының үйлеріне 7 айдан кейін алғаш рет су берілді.
