Ақмола облысында туризм дамуының оң үрдісі байқалады. Бұл туралы Ақмола облысының әкімі Ермек Маржықпаев Орталық коммуникациялар қызметінде өткен өңірдің 4 айдағы әлеуметтік-экономикалық дамуына арналған брифинг барысында айтты.
Өткен жылдың қорытындысы бойынша Ақмола облысы Қазақстанда туризмді дамытудың бес драйверіне кірді.
Өңірге келудің жалпы құрылымындағы көшбасшы Щучинск-Бурабай курорттық аймағы болып табылады. Курорттық аймақта біржолғы сыйымдылығы 9 мыңнан астам төсек-орын 183 орналастыру объектісі жұмыс істейді.
Биыл Щучинск-Бурабай курорттық аймағын дамытуға 4,6 млрд. теңге бөлінді. Курорттық аймақтың қолжетімділігін қамтамасыз ету үшін көлік инфрақұрылымының 5 жобасы іске асырылуда, 100 км жол төсемі салынып, жөнделеді.
Спикер қазақстандықтар облыстың туробъектілеріне көбірек қызығушылық таныта бастағанын атап өтті. Мысалы, 2022 жылы курорттық аймаққа жалпы туристік ағын 1 млн. астам адамды құрады. Ағымдағы жылы 23 млрд.теңгеге 200-ге жуық жұмыс орны ашылатын 65 инвестициялық жобаны іске асыру есебінен туристердің бір миллион екі жүз мың адамға дейін ұлғаюы болжануда.
Сондай-ақ, маңызды нысан – «Aqbura Resort» қонақ үйі бар қалалық орталықты ашу жоспарлануда.
«Бүгінгі таңда Бурабайда жаңа демалыс маусымы ашылды. Абаттандыру және санитарлық тазалау бойынша дайындық іс-шаралары кешенін ұйымдастырудың арқасында курорттық аймақ келушілерді қабылдауға толық дайын», – деп қорытындылады өңір басшысы.
