Конституция Күні қарсаңында және ел Тәуелсіздігінің 30 жылдығы аясында Шортанды кентінің Ойын-сауық орталығында салтанатты іс-шара өтті,-деп хабарлайды «Aqmola News» ақпарат агенттігі.
Өзінің құттықтау сөзінде аудан әкімінің міндетін атқарушы Қабдолла Орынбасаров шортандылықтарды мерекемен құттықтап, ерекше көзге түскен мамандарға алғыс хаттар табыс етті.
«Қазіргі уақытта Қазақстанды бүкіл әлем қарқынды дамып келе жатқан елдердің бірі ретінде біледі. Конституцияны ұстану – мемлекеттің табысты дамуының және қоғамдағы азаматтық келісімнің негізі. Біздің борышымыз – Конституцияға ұқыппен қарау және құрметтеу. Осы айтулы күні барлығыңызға жақсылық, амандық және бейбіт өмір тілеймін», – деді аудан әкімінің міндетін атқарушы Қ.Н. Орынбасаров.
Бұл күні орталық кітапхана жүйесі Қазақстан Конституциясының құрылуымен және дамуымен толығырақ танысқысы келетіндерге көрме ұйымдастырды.
Мемлекеттік мерекеге арналған салтанатты шараны жергілікті әртістердің концерттік бағдарламасы аяқтады.
