Ақкөл ауданының әкімі Алпысбай Қайыржанов Азат ауылына жұмыс сапарымен барып, шаруалардың жағдайымен танысып, жергілікті ауыл шаруашылығы кәсіпорындарының басшыларымен кездесті,-деп хабарлайды «Aqmola News» ақпарат агенттігі.
Азат ауылында орналасқан «Toly Service» шаруа қожалығын аралау барысында аудан басшысы ұсақ мал өсіруге маманданған шаруашылықтың материалдық базасымен танысты.
Қожалық иесі Мұқан Хабихазидің айтуынша, «Toly Service» 2019 жылы құрылған. Бүгінгі күні шаруашылықта Еділбай тұқымының 320 бас қойы бар, сондай-ақ кәсіпорында 2000 гектар жайылым, оның ішінде егістік алқабы бар.
Кәсіпорын ШҚ аумағында асхана мен монша салынған. Бүгінде қожалық 7 адамды жұмыспен қамтып отыр.
Аймақ басшысы шаруашылық басшыларынан туындаған мәселелерді бақылауға алып, шешу жолдары бойынша бірқатар ұсыныстар берді.
