Ақмола облысының 51 жастағы тұрғыны өз баласына 2 млн. теңгеден астам қарыздар болып қалды, деп хабарлайды «Aqmola News» Ақмола облысы полиция департаментінің баспасөз қызметіне сілтеме жасап.
Осы жылдың 8 шілдесінде полицияға арыз берген 45 жастағы әйелдің айтуынша бұрынғы күйеуі 2008 жылдан бері алимент төлемеген. Бүгінге дейінгі қарызы 2 259 656 теңгені құраған.
«Тәртіп сақшылары Красный Яр ауылында алимент төлемеушінің нақты тұратын мекенжайын анықтады. Қазіргі уақытта аталған факті бойынша ҚР ҚК 139-б. 1-бөлімімен көзделген «Балаларды күтіп-бағуға қаражат төлеу жөніндегі міндеттерді орындамау» сотқа дейінгі іс жүргізу басталды», – дейді Ақмола облысы полиция департаментінің баспасөз қызметінің жетекшісі Гүлнәр Пинчук.
Бауыр еті баласының несібесін аузынан жырған әкеге қатысты міндетті түрде келу туралы процессуалдық мәжбүрлеу шарасы қолданылды.
Полицияның мәліметінше бүгінгі күні Ақмола облысы бойынша іздестіру жарияланған алимент төлемеушілердің тізімінде 23 адам бар.
