Облыстық полиция департаменті баспасөз қызметінің мәліметі бойынша, 23 ақпан күні сағат 08:00-де Сәтбаев көшесіндегі үйдің ауласында белгісіз адам оқ атқан. Жарақат алған тұрғын оқиға орнында жан тапсырды.
Аталған факті бойынша ҚР ҚК 99-бабы 1-бөлігіне сәйкес сотқа дейінгі тергеу басталды.
– Жедел-іздестіру іс-шараларының нәтижесінде полиция қызметкерлері осы қылмысты жасады деген күдікпен 65 жастағы ер адамды ұстады, – деп хабарлады ПД бастығы Нұрлан Мәсімов.
Оқиғаның мән-жайы мен себептері анықталуда. Күдікті Екібастұз қаласының уақытша ұстау изоляторына қамалды. Қару-жарақ тәркіленді. Қазақстан Республикасы ҚПК-нің 201-бабына сәйкес өзге ақпарат тергеу мүддесінде жарияланбайды.
Еске сала кетейік, кеше Екібастұзда куәгерлердің көзінше ер адамды атып өлтірген болатын. Қылмысты көшедегі бейнебақылау камералары жазып алған.
