Ақмола облысы төтенше жағдайлар департаментінің 197 өрт сөндірушілері мен құтқарушылары Ресей Федерациясының Красноярск қаласында қызметтік міндеттерін атқару кезінде қаза тапқан жауынгерлерді үнсіздікпен еске алды, деп хабарлайды «Aqmola News» Ақмола облысы төтенше жағдайлар департаментінің баспасөз қызметіне сілтеме жасап.
Ақмолалық өрт сөндірушілер сержант Максим Рябцев, аға прапорщиктер Алексей Пузырев пен Анатолий Жалнерчиктің жақындары мен туған-туыстарына қайғыларына ортақтасып көңіл айтады.
Естеріңізге сала кетсек, 3 ақпан күні Ресей Федерациясының Краснояр өлкесінде автоқоймадан өрт шығып үш құтқарушы мен бір жұмысшы ажал құшқан. Ресей төтенше жағдайлар министрлігінің мәліметінше куәгерлердің жанып жатқан ғимаратта адамдар болуы мүмкін деген хабарламасынан кейін газды түтіннен құтқару қызметінің құтқарушылары іздеуге кіріскен.
Өрт аумағының 3,9 мың шаршы метрге дейін ұлғаюына байланысты ғимараттың шатыры құлап, үш өрт сөндірушімен байланыс үзілген. Соңғы сөйлесу кезінде жігіттер оларға ауа жетпей жатқанын хабарлаған.
