Бүгін кеншілер қаласының еріктілер штабы қайырымдылық акциясын жариялады. Шаһар көшелері мен аялдамаларында белсенді жастар қарағандылықтарға ыстық шай ұсынады. Тұрғындар акцияға қатысты қуаныштарын білдіріп, және жастардың жақсы көңіл-күй сыйлап жатқанын атап өтті. Бұл туралы облыстық әкімдіктің баспасөз қызметі хабарлады.
Еріктілер тұрғындардан аязды күндері бір-біріне жанашыр болуды сұрайды.
Еріктілер қала тұрғындарын жақсылық пен игі істер тізбегін құруға шақырады. Осы аязды күндері бір-біріне мейірімділік танытып, жанашыр болуды өтінеді. Штаб мүшелері келесідей ұсыныстар жасап отыр:
– Егер сіз көлік жүргізіп, аялдамада тұрған адамды көрсеңіз, өтіп кетпей, оны алып кетуді ұсыныңыз.
– Егер сіз автокөлік жүргізушілерінің бірі өз көлігін оталдыра алмай тұрғанын көрсеңіз, көмектесіңіз.
– Қалада бағдаршамдар мен қиылыстарсыз көптеген кішкентай көшелер бар, онда жаяу жүргіншілер тұрып, көліктердің өтуін күтеді. Олар жаурап қалмас үшін өткізіп жіберуге тырысыңыздар.
– Аязды күндері таксиге қоңырау шалу саны артып кетеді. Жүргізушілер, бағаны көтермеңіздер, жерлестеріңізді құрметтеңіздер!
– Кәсіпкерлер, адамдарды өз нысандарыңызға кіріп, жылынып алуға рұқсат етіңіздер! Келушілер мен жол жұмысшыларына ыстық шай ұсыныңыздар!
