17 қаңтарда басталатын жаңадан сайланған АҚШ президенті Джозеф Байденнің инаугурациясын тойлау апталығының ашылу салтанатына қатысатын қазақстан әнші Димаш Құдайберген Вашингтон қаласында болған жаппай тәртіпсіздікке қатысты пікір білдірді.
«Мен АҚШ-та болып жатқан оқиғалар жақын арада шешіледі деп үміттенемін және сенемін. Сондай-ақ, біздің пікіріміз әр түрлі болса да, бір-бірімізді құрметтеуді үйренуіміз керек. Біз зорлық-зомбылықсыз әлемде өмір сүру үшін жұдырықтай жұмылуымыз қажет», – деді әнші.
Еске сала кетейік, 7 қаңтарда Вашингтондағы жаппай наразылықтан кейін Дональд Трамптың жақтастарының бір бөлігі Конгресс ғимаратына кірді. Дональд Трамп жиналыс басталмас бұрын Вашингтонның орталығында мыңдаған адам қатысқан митингіде сөз сөйлеп, жеңілісті мойындаудан бас тартып, жақтастарын Капитолий ғимаратына баруға шақырды.
Вашингтонда жаппай тәртіпсіздікке қатысты коменданттық сағат енгізілді. Дональд Трамптың танымал әлеуметтік желілердегі аккаунты уақытша бұғатталды.
АҚШ президенті Дональд Трамп Twitter парақшасы арқылы бейнеүндеу жасап, Вашингтондағы тәртіпсіздіктерге қатысқандардың заң алдында жауап беретінін мәлімдеді.
