Ақмолалық оқушы Серік Нұрбек ІV онлайн айтыстың республикалық кезеңінің қола жүлдегері атанды,-деп хабарлайды «Aqmola News».
«Шын хакім, сөздің асыл бағына жетпес» атты IV республикалық онлайн айтыс Елбасының «Болашаққа бағдар: рухани жаңғыру» атты мақаласындағы ұлттық кодты жаңғырту идеясын жүзеге асыру шеңберінде және ұлы Абайдың 175 жылдық мерейтойына орай 14-15 желтоқсанда Абай атындағы дарынды балаларға арналған республикалық мамандандырылған қазақ тілі мен әдебиетін оқытатын орта мектеп-интернатында ұйымдастырылды.
Жалпы білім беру ұйымдарының 8-11 сынып оқушылары үшін ұйымдастырылған жарысқа Қазақстанның барлық өңірлерінен 28 оқушы қатысты.
Ақмола облысынан қатысушы Серік Нұрбек, Зеренді ауданы, М.Ғабдуллин атындағы қазақ орта мектебінің 9-сынып оқушысы III орын және 30 000 теңге көлемінде ақшалай сыйлық алды.
Сондай-ақ, ынталандыру және дарындылықты одан әрі дамыту мақсатында Серік Нұрбек байқаудан тыс Абай атындағы дарынды балаларға арналған Қазақ тілі мен әдебиетін тереңдетіп оқытатын республикалық мамандандырылған орта мектеп-интернатқа қабылдану үшін жолдама алды.
