Қазақстан Республикасы Президентінің жыл сайын дәстүрлі түрде өтетін «Алтын Сапа» сыйлығының салтанатты жиыны өткізілді. «Іскер» арнайы аталымы ақмолалық өндіруші кәсіпорнына табыс етілді, деп хабарлайды «Aqmola News» Ақмола облысының кәсіпкерлер палатасының баспасөз қызметіне сілтеме жасап.
Салтанатты шараға Мемлекет басшысы Қасым-Жомарт Тоқаев, Үкімет басшысы Асқар Мәмин, «Атамекен» ҰКК президиум алқасының басшысы Тимур Құлыбаев пен «Атамекен» ҰКК басқарма төрағасы Абылай Мырзахметов қатысты.
Шара барысында «Іскер» арнайы сыйлығының лауреаттары да анықталды. Ол Қазақстанның ірі ұн өндірушілерінің бірі ақмолалық «INTER TRADE» кәсіпорнының еншісіне тиді.
«Біздің өндірілген өніміміз Қазақстанның сапа көрсеткіші болып табылады. Атбасар ұны өз саласының көшбасшысы атанды, – деп атап өтті кәсіпорын басшысы Магомет Дзейтов.
Аталған компания 1999 жылы Атбасар қаласында пайда болған. Бүгінде «INTER TRADE» заманауи құрылғылармен, техника және компьютерлік жүйелермен жабдықталған ірі механикаландырылған кәсіпорын.
Кәсіпорын аумағы жалпы ауданы 12 гектардан астам жекеменшік жер учаскесінде орналасқан.
Компанияның жоғары, І және ІІ сұрыпты жұмсақ ұн тартатын дербес диірмен кешені бар. Жұртшылыққа өнімділігі тәулігіне 150 тоннадан асатын «Атбасар ұны» деген атпен таныс.
«INTER TRADE» сауда маркасының ұны бүгінгі таңда Қазақстанға ғана емес сондай-ақ Тәжікстан, Ауғанстан, Өзбекстан, Қырғызстан, ТМД елдері сияқты алыс-жақын шетелдерге де жөнелтілуде.
Кәсіпорын одан әрі даму қарқынын арттырып, болашақта тәулігіне 60 тоннаға дейін бидайдың қатты сұрыптарын өңдейтін диірмен кешені жобасын іске қоспақ.
Естеріңізге сала кетсек, «Іскер» арнайы сыйлығы 2015 жылы өз саласындағы үздік кәсіпорындарды қолдау мақсатында тағайындалған.
