Сандықтау ауданының әкімі Асқарбек Үйсімбаев аудан мектептерінің қысқы маусымға әзірлігі мен мемлекеттік бағдарламалармен жүргізілген жөндеу жұмыстарын назарға алды, – деп хабарлайды «Aqmola News» Сандықтау ауданы әкімдігінің баспасөз қызметіне сілтеме жасап.
Аудан әкімі кезекті сапарында Мәдениет ауылындағы орта мектепке барды.
Мектеп қысқы маусымға толықтай әзірленген. Әрі қазірден бастап мектепті жылуға қосылған. Үш айға жететін 133,8 тонна көмір, КТ300 жаңа екі жылу қазандықтары қойылған. Сондай-ақ, биыл «Жұмыспен қамту жол картасы-2020» мемлекеттік бағдарламасымен жаңадан пластикалық терезелер қойылған. «Мәдениет» жауапкершілігі шектеулі серіктестігінің демеушілігімен көмір қоймасы салынған. Ал ата-аналар мен мұғалімдердің күшімен мектеп ауласында жылыжай салынған.
Мектеп директоры Любовь Кистанованың айтуынша мектеп штаттық режимде барлық санитарлық нормалармен жұмысын жалғастыруда.
Мектеп штаттық режимде жұмыс істегендіктен балалар сабаққа қатысуда. Ауырған балалар жоқ. Коронавирус инфекциясының алдын алу үшін барлық санитарлық-эпидемиологиялық талаптар сақталып отыр, – дейді Любовь Кистанова.
