Спорт кешенінде шағын футбол, баскетбол, волейбол, тренажер және күреспен айналысуға арналған әмбебап залдар, сондай-ақ, бассейн болады деп күтілуде, – деп хабарлайды Ақмола облысы дене шынықтыру және спорт басқармасының баспасөз хатшысы Махаббат Большина.
Қазіргі таңда аудан орталығы Степняк қаласында дене шынықтыру-сауықтыру кешенінің құрылысы қарқынды жүріп жатыр.
«Аудандарда спортты дамыту үшін біз барлық жағдайды жасауымыз керек. Жаңа кешенде спортпен шұғылданушылар саны артады деген ойдамыз. Олардың арасында алдағы байрақты бәсекелерде, халықаралық жарыстарда аудан абыройын асқақтатып, ел намысын қолдан бермейтін болашақ спорт саңлақтары болады деген үміттеміз», – дейді аудандық дене шынықтыру және спорт бөлімінің басшысы Арман Истаев.
Арман Сапарғалиұлы атап өткендей, бүгінгі таңда құрылыс жұмыстарының 85 пайызы орындалды. Жаңа кешенде шағын футбол, баскетбол, волейболға арналған, сондай-ақ, тренажер және күрес залдары мен бассейн болады деп күтілуде.
