Ақкөл қаласының іргесіндегі орман алқабында адасқан 18 жастағы қыз тәртіп сақшыларының дереу із кескенінің арқасында аман-есен табылды, – деп хабарлайды «Aqmola News» Ақмола облысы полиция департаментінің баспасөз қызметіне сілтеме жасап.
Жас қыз қалың орманда жидек теріп жүріп адасып кеткен.
23 шілде күні Ақкөл аудандық полиция бөлімінің кезекші бөлімшесіне телефон шалған 18 жастағы қыз Ақкөл қаласының қайыңды орман арасында адасып кеткенін хабарлаған. Қатты қорыққан қыз өз ұялы телефонының қуаты азайғанын, ал нақты қай жерде жүргенін білмейтінін жеткізеді.
Тәртіп сақшылары дереу орман арасында адасып кеткен қызды табуға кешенді іздестіру шараларын ұйымдастырды. Жүрген ізінен жаңылысып, жанұшырып орманнан шығуға әрекеттенген 18 жастағы қызды полиция бөлімінің жеке құрамы, төтенше жағдайлар бөлімінің қызметкерлері «Авилесса» әскери күзет сарбаздары, орманшылар мен еріктілер атсалысты. Полицияның және басқа да сала мамандарының бірлескен жұмысының нәтижесінде жоғалған қыз жарты сағат аралығында аман-сау табылды. Қалың ағаш арасында ішінде жидек терудің қызығына түсіп кеткен қыз бір-ақ сәтте адасып кеткенін байқамай да қалыпты, – дейді Ақмола облысы полиция департаментінің баспасөз хатшысы Әсем Әбдірахманова.
Іздеу шараларына 10 автокөлік оның екеуі жол талғамайтын көліктер мен бір тікұшақ қолданылған. Қазіргі уақытта адасып кеткен қыз бала аман-есен үйіне оралды. Телефон шалынған соң бірден әрекетке көшіп, жедел көмек көрсеткен тәртіп сақшыларына алғысын білдірді.
Полиция қызметкерлері орманға саңырауқұлақ немесе басқа да жеміс-жидек терген кезде барлық қауіпсіздік шараларын естен шығармауға шақырады.
