ҰБТ-ның бес күндік нәтижесіне сәйкес, Степногорск қаласы № 4 облыстық «Болашақ» метебінің түлегі Өндіріс Диас 128 балл жинады,-деп хабарлайды «Aqmola News».
26 маусымда ҰБТ Ш.Уәлиханов атындағы мемлекеттік университеті мен Нұр-Сұлтан қаласы С.Сейфуллин атындағы агротехникалық университетте барлығы 270 түлектің емтихан тапсыруы жоспарланып, оның 266 тест тапсырды.
Түлектерді тестілеуге кіргізу сәтінде Көкшетау қаласы №2 орта мектебінің оқушысынан телефон мен шпаргалка табылып, емтиханға кіргізілмеді. Сондай-ақ, дәл осы мектептің түлектерінің бірі науқастанып қалуына байланысты тестілеуге қатыса алмады. №1 орта мектебінде болған тестілеуге бір түлек себепсізден келмей қалса, №19 орта мектептегі тестілеу бекетінен ережені бұзған бір түлек шығарып жіберілді, – дейді Шоқан Уәлиханов атындағы Көкшетау мемлекеттік университеті жанындағы ұлттық тестілеу орталығы филиалының жетекшісі Қуаныш Мұхамбетжанов.
Ұлттық бірыңғай тестілеудің алғашқы бес күнінде облыста тестілеуді тапсыруға ниет білдірген 3718 түлектің 1383-і яғни 37 пайызы тапсырды. Степногорск қаласының №4 «Болашақ» орта мектебінің түлегі Өндіріс Диас облыс бойынша ең жоғары 128 балл жинаған.
Жалпы Ұлттық бірыңғай тестілеу штаттық режимде өтуде. Тиісті мемлекеттік органдардың мәліметінше барлық санитарлық-эпидемиологиялық талаптардың сақталуы қамтамасыз етілген.
