Ақмола облысында «Ел бірлігі» қоғамдық бірлестігі шілденің алғашқы жексенбісі «Домбыра күніне» орай домбырашылар арасында облыстық байқауын ұйымдастыруда,-деп хабарлайды «Aqmola News».
Майра ҚУАНЫШҚЫЗЫ
Қазақтың болмысын домбырасыз елестету мүмкін бе? Облыс домбырашыларын бір арнаға тоғыстырып, ұрпақ тәрбиесіне әсерін тигізетін іс-шара ұйымдастырудағы мақсат та – қазақтың құнды аспабын дәріптеу дейді ұйымдастырушылар.
Байқау үш аталым бойынша өтеді. Айтыскер ақындардың арнаулары, дәстүрлі әншілердің әндері және домбырашылардың күй орындау шеберлігі бойынша бәсекелі тартыс болмақ. Бұл байқау өңір жастарының мәдени құндылықтарды терең сезінуіне себепші болады деген үмітіміз бар,-деді байқауды ұйымдастырушы «Ел бірлігі» қоғамдық бірлестігінің жетекшісі Бақыт Смағұл.
Күні кеше басталған өнерлілер сайысының іріктеу кезеңі 26 маусымға дейін жалғасады.
Осы карантин уақытында, көрермен жинай алмайтын қиын кезеңде онлайн жүйедегі бір керемет бастама деп айтар едім. Себебі, елдің ішінде қаншама танылмай жүрген жас дарындар бар, шыға алмай жүрген таланттар бар, осылардың өнерлерін, шығармашылығын халыққа насихаттау мақсатындағы тамаша жоба деп есептеймін. Ақмола облысы бойынша өздерінің өтініштерін білдірген өнерпаздар өте көп. Солардың ішінен мықтыларын іріктеп-іріктеп шығаратын боламыз,-дейді Көкен Шәкейұлы атындағы ақындар мектебінің жетекшісі Мұхамед Қоңқаев.
Байқау шартына сәйкес, үміткерлер өнерлерін бейнетаспаға жазып, ұйымдастырушылардың фейсбук әлеуметтік желісіне орналастыруы тиіс. Іріктеп алынған қатысушыларды әлеуметтік желі қолданушылары лайк арқылы бағалап, жеңімпазды анықтайтын болады.
