Еліміздегі карантин шектеулеріне байланысты облыстық мәслихаттың кезекті сессиясы онлайн түрде өтті, – деп хабарлайды Aqmola News.
Жабық есік жағдайында онлайн көрсетілім түрінде ұйымдастырылған сессияда облыстың бюджеті, ана мен бала өлімін төмендету, білім беру саласының дамуы, тұрғын үй-коммуналдық шаруашылық саласын жетілдіру жайы сөз болды.
Облыстық тексеріс комиссиясының деректеріне бойынша облыста 8 мың жаңа жұмыс орны құрылған. Бірақ бірқатар басқармалар бюджет қаражатын игермеген. Атап айтқанда, ауыл шаруашылығы, мәдениет, табиғи ресурстар, білім беру, және энергетика және тұрғын үй-коммуналдық шаруашылығы басқармаларында бюджеттің толық игерілмегені байқалған.
Өткен жылдың қорытындылары бойынша 108 миллион теңге бюджет қаражаты игерілмеген. Бұл орайда облыстың энергетика және тұрғын үй-коммуналдық шаруашылығы басқармасы көш бастап тұр. Басқарма 53 миллион теңгені игере алмаған. Құрылыс басқармасы Көкшетау қаласының онкологиялық емханасна жаңа құрылғылар алу үшін 683 миллион теңге жұмсаған, – деді Ақмола облыстық тексеріс комиссиясының басшысы Нұрлан Бекенов.
Мәслихаттың кезекті сессиясында облыстық білім басқармасының басшысы Бейбіт Жүсіпов те саладағы оң өзгерістер жайлы баян етті.
Облыста қазіргі уақытта ауылды жерлерде 2 752 мұғалім қызмет атқарады. Олар бюджеттен коммуналдық қызметер мен отын-көмір сатып алу үшін 41 170 теңге, сондай-ақ, жыл сайын 15 айлық есептік көрсеткіш мөлшерінде қосымша қолдау алатын болды, – деді Бейбіт Жүсіпов.
Облыстық мәслихат талдаған тағы бір тақырып, коронавирус инфекциясымен күрес жағдайы болды. Өңір ауруханаларында КВИ жұқтырғандарға арналып 837 кереует әзірленген. Депутаттар эпидемиологиялық жағдайдың ушығып жатқанына байланысты қосымша қаражат бөлудің қажеттігін атап өтті. Сүзгілік клапанды бетперделер сатып алу қажет. Олар кәдімгі медициналық бетперделерге қарағанда 12 сағат бойы қолдануға жарамды. Облыста қазіргі уақытта 11 мың литр антисептика қажет, – деген депутаттар тиісті органдардан мәселелерді шешу қажеттігін ескертті. Барлық мәселелер бойынша хаттамалық шешімдер қабылданды.
