Ақмола облысында «Степногорск – Ақкөл» автожолында орналасқан блок-бекетінде заңсыз адам тасымалдап жүрген жүргізуші ұсталды, деп хабарлайды «Aqmola News» облыстық Полиция департаментінің баспасөз қызметіне сілтеме жасап.
Полиция қызметкерлері кезекшілік кезінде «Степногор-Ақкөл» тасжолындағы №1 блок-бекетте «Mersedes Benz – 300E» көлігін тоқтатқан. Белгілі болғандай, заң бұзушыға «Өнеркәсіптік биосинтездің ғылыми-зерттеу институты» ЖШС тарапынан облыс орталығына, сондай-ақ Ақмола облысының аудандары мен қалаларына кіріп-шығуға рұқсат берілген. Рұқсат құжатында жүргізушінің ветеринарлық препараттарды жеткізіп берумен айналысады деп көрсетілген.
Бірақ тәртіп сақшылары оның «Indriver» мобильдік қосымшасы арқылы тапсырыс қабылдап, заңсыз адамдарды тасымалдаумен айналысқанын анықтады. Жүргізуші барлығы 4 адамды тасымалдап үлгерген. Әрбір рейс үшін 20 мың теңге сұраған.
«Заңбұзушының үстінен ҚР ӘҚбК 476-бабының 1-бөлігі (төтенше жағдай режимін бұзу) және ҚР ӘҚбК 463-бабының 1-бөлігі (кәсіпкерлік қызметпен айналысу) бойынша әкімшілік хаттамалар толтырылды»,- дейді ведомстводан.
