Қазақстанда төтенше жағдай режимі сәуірдің соңына дейін ұзартылатын болды, – деп хабарлайды «Aqmola news».
Бұл туралы мемлекет басшысы Қасым-Жомарт Тоқаев төтенше жағдайлар жөніндегі мемлекеттік комиссияның отырысы кезінде мәлімдеді.
Сонымен қатар Президент қауіптің беті әлі қайтпағандықтан карантин мерзімін созу қажеттігін атады.
Қатаң карантиндік шаралар өз нәтижесін берді. Елордада және Алматы қаласында науқастар санының өсуі тұрақтанды. Дегенмен жалпы экономикалық ахуал, қазақстандықтардың әлеуметік әл-ауқатындағы жағдай өте күрделі болып отыр. 15 сәуірде менің төтенше жағдай жариялау туралы Жарлықтың мерзімі аяқталады. Қазірдің өзінде төтенше жағдай режимін ең болмағанда сәуірдің соңына дейін ұзарту қажеттілігі сезіліп отыр. Біз әлі коронавирус инфекциясы таралуының шырқау шегіне жеткен жоқпыз. Сондықтан эпидемиямен күресті тоқтатуға болмайды. Сондықтан Елордада, Алматы және Шымкент қалаларында, сонымен қатар тиісті облыстарда сәуірдің соңына дейін карантин режимін ұзартуды тапсырамын. Адамдар бұрынғыдай көшеге шығып, қалыпты өмір сүруді қалайтынын түсінемін. Бірақ карантинді сақтап оқшауланудан басқа амал жоқ. Бұл отандық және халықаралық мамандардың ұсынысы, – деді Қасым-Жомарт Тоқаев.
